媒體報導(九): 新報 2011-12-07

新報 2011-12-07
C07 娛樂消閒 By 陳超

爆汁牛肉餅 Hit爆九龍城
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

招牌菜100強 plus 食通港九新界各區招牌菜
為食成性的翅女，今年特別聯同幾位朋友仔參加「第3屆九龍城書節」，一齊合租書節地攤，又賣舊書又賣D.I.Y.飾物又賣自家製曲奇，朝11晚9，雖然好攰，但不少人都對翅女做的曲奇讚不絕口，翅女當然開心死啦！阿穌見地攤做得成功，特別拉埋剛收工的翅女到附近的九龍城開餐，諗住一邊飲飲食食、一邊同翅女商量未來的地攤大計，實行一齊殺出一條血路！
牛肉餅皮薄多汁 羊腩不羶不韌
來到九龍城，條條街都是食街，左一間火鍋店、右一間泰國菜館，看得人眼花繚亂，翅女亦不禁大呼：「食乜好？食乜好？食乜好？」
「你稍安毋躁。嗱，咪到囉！清真牛肉館呀，全九龍城有邊個唔識佢呀！咪講咁多，入去坐坐」，阿穌一馬當先，二話不說就衝入店子，翅女當然不執輸，以「豹速」尾隨阿穌其後。
翅女坐低睇睇餐牌，便問：「我都知呢間牛肉館好出名呀，但其實佢唔少菜式都同一般中式小菜冇乜分別，究竟佢有乜咁特別？」
「因為係伊斯蘭教嘛，唔食豬肉之外，其他肉類如牛肉、羊肉咁，都要唸過經先可以食㗎，咁麻煩，你話香港有幾多間會做？而且，佢哋價錢合理，所以好受街坊、遊客歡迎，你睇九龍城咁多泰國菜館佢都可以殺出條血路就知啦」，說話期間，即有人進來order外賣「牛肉餅」，證明阿穌所言非虛。
趁阿穌說話，翅女已經急不及待挾起剛上桌的「牛肉餅」：「嘩！爆汁！好熱！但好好味呀！餅皮夠薄，而且牛肉中間加入咗少少菜脯調味，味道比較天然，唔會一咪死鹹，非常有層次，唔怪得蔡佬成日推介佢啦，佢今日嚟唔到就真係可惜喇……」
「嚟嚟嚟，仲有呢個『咖喱羊腩』都一定要試，羊腩唔羶不在講，個咖喱以唔少香料烹調，香味濃之餘，辣味仲相當有層次」，阿穌一手拎起連骨羊腩就食。
翅女亦好識食：「係？咁就要嚟多兩個白飯撈咖喱喇！呀唔該，兩個『靚仔』！」
食客真心話
睇完上次招牌菜100強介紹西灣河金記冰室，真係令小弟好有衝動去試下，因為喺舊區長大關係，對於兒時食開嘅嘢真係特別有感覺，先唔講食物質素，就係保留至今嘅舊裝修，我已經覺得可以一試啦！何況冰室食嘅差極我估都有個譜。
我個人理解，冰室同茶餐廳係兩種唔同嘅地方，茶餐廳係有炒嘢，可以一家大細開飯；但冰室頂多都只係食通粉麵包之類，論份量唔係正餐咁多。就係因為咁，佢先有種俾人嘆茶嘅感覺，所以特別啱我。
我對奶茶有啲要求，而聽講呢間嘢啲奶茶係飲得過，所以我就叫咗個餐試下佢哋啲手勢。我叫咗個甲餐，裏面煎蛋多士同火腿通粉，蛋煎得唔錯，個樣都算靚仔。而多士亦烘得好脆口，加上牛油，真係幾香脆幾好食。但個通粉就唔多掂囉，浸到發晒，不過呢點都算係冰室嘅通病，意粉通粉都係淥定再放湯，等如煮咗兩次，有乜可能唔發呢。講番杯奶茶，用嘅係厚身奶茶杯，感覺係正宗冰室，聞落好香奶茶味，入口香濃，質感滑溜，飲完嘴唇上面好似有層薄膜咁，咁就証明奶同茶嘅比例正確，我絕對會因為呢杯奶茶再返轉頭。不過金記亦有要檢討嘅地方，就係地方衛生問題，我想嚟歎茶，但真係坐得唔多自在，食物好都要環境正至得嘛！但如果你係故意想啲人食完快啲走嘅話，咁就冇計啦！
陳超
評分：★★★★★
咖喱羊腩
‧以多種香料煮成的咖喱，跟一般咖喱比較，不會死鹹死辣，反而極具香味，惹味非常。
評分：★★★★★
雞肉雲吞 ‧雲吞同樣皮薄餡靚，湯汁亦熬得入味。
評分：★★★★★
嫩雞燴麵 ‧雞粒嫩滑、菜粒爽口，甚有份量，一碗已經足夠兩人享用。
評分：★★★★★
牛肉餅‧牛肉餅煎得金黃可口，適宜熱呼呼時吃，爆出來的汁特別鮮味。
清真牛肉館地址：九龍城龍崗道1號電話：2382 2822
逢周三、六刊登 讀者報料熱線：p.lau@hkdailynews.com.hk